ភ្នំពេញ៖ រដ្ឋលេខាធិការក្រសួងសង្គមកិច្ចលោក ឯម ច័ន្ទមករា បានអបអរសាទរជូនចំពោះលោក ហ៊ុន ម៉ាណែត ដែលត្រូវបានព្រះមហាក្សត្រត្រាស់បង្គាប់ដំឡើងឋាន្តរស័ក្កិជានាយឧត្តមសេនីយ៍ (ផ្កាយ៤) ដែលជាតំណែងកំពូលនៃកងទ័ពជាតិ។ លោកថាលោក ហ៊ុន ម៉ាណែត ពិតជាស័ក្កិសមនឹងឋាន្តរស័ក្កិនេះដោយសារការលះបង់ដ៏ធំធេងជូនជាតិមាតុភូមិកម្ពុជា។

លោក ឯម ច័ន្ទមករា បានលើកឡើងថាលោក ហ៊ុន ម៉ាណែត បានធ្វើកិច្ចការជាច្រើនជូនជាតិមាតុភូមិចាប់តាំងពីលោកបានកាន់តំណែងក្នុងជួរកងទ័ពតាំងពីឆ្នាំ១៩៩៥មក ហើយភាពលេចធ្លោរបស់លោក ហ៊ុន ម៉ាណែត មានជាច្រើនដូចជាជាពលរដ្ឋខ្មែរដំបូងបំផុតដែលបញ្ចប់ការសិក្សានៅបណ្ឌិតយោធាអាមេរិក West Point ជាមេទ័ពជើងគោកដែលមានទស្សនវិស័យដែលអាចឃើញតាមរយៈកំណែទម្រង់ជាច្រើនក្នុងជួរកងទ័ពតាំងពីលោកបានកាន់តំណែងនេះក្នុងឆ្នាំ២០១៨ ហើយការលះបង់លោក ហ៊ុន ម៉ាណែត ក្នុងការដឹកនាំការប្រយុទ្ធប្រឆាំងជំងឺកូវីដ-១៩ បានសបញ្ជាក់កាន់តែច្បាស់ថាលោក ហ៊ុន ម៉ាណែត ពិតជាស័ក្កិសមនឹងតំណែងកំពូលនេះ។

លោករដ្ឋលេខាធិការបានបន្ថែមថា ក្រៅពីតួនាទីក្នុងជួរទ័ពលោក ហ៊ុន ម៉ាណែត ក៏ជាបុគ្គលសាធារណៈម្នាក់ដែលពលរដ្ឋជាច្រើនចូលចិត្តផងដែរ ការមិនប្រកាន់ខ្លួន និងការចូលរួមស្ទើគ្រប់វិស័យរបស់លោកបានកសាងឈ្មោះទៅកាន់ពលរដ្ឋស្គាល់កាន់តែច្រើនផងដែរ។

គួរឱ្យដឹងផងដែរថាតាមរយៈរាជក្រឹត្យចុះថ្ងៃទី១៧ ខែមីនា ឆ្នាំ២០២៣ ឡាយព្រះហស្ថលេខាដោយព្រះមហាក្សត្រ សម្ដេចព្រះបរមនាថ នរោត្តម សីហមុនី ទ្រង់បានត្រាស់បង្គាប់ដំឡើងឋានន្តរស័ក្ដិលោក ហ៊ុន ម៉ាណែត ពីឧត្តមសេនីយ៍ឯក (ផ្កាយ៣) ទៅជា «នាយឧត្តមសេនីយ៍» ដែលជាឋាន្តរស័ក្កិខ្ពស់បំផុតក្នុងជួរកងទ័ព។

លោក ហ៊ុន ម៉ាណែត អាយុ៤៤ឆ្នាំ គឺជាកូនប្រុសច្បងរបស់នាយករដ្ឋមន្ត្រីកម្ពុជា សម្ដេច តេជោ ហ៊ុន សែន។ លោកជាជនជាតិកម្ពុជាដំបូងដែលបញ្ចប់ការសិក្សានៅឯបណ្ឌិតសភាយោធា West Point របស់សហរដ្ឋអាមេរិក និងជាបណ្ឌិតសេដ្ឋកិច្ចនៃសកលវិទ្យាល័យ Bristol របស់ចក្រភពអង់គ្លេសផងដែរ។ បច្ចុប្បន្ន លោក ហ៊ុន ម៉ាណែត មានឋារន្តរស័ក្កិជាឧត្តមសេនីយ៍ឯកផ្កាយ៣ កាន់តួនាទីជាអគ្គមេបញ្ជារងទ័ព និងជាមេបញ្ជាការកងទ័ពជើងគោកនៃកងយុទ្ធពលខេមរភូមិន្ទ៕